LAB BO‘YOG‘I HUSNNI BUZADIMI?

Har bir xonim ko‘chaga otlanar ekan, albatta, ko‘zgu qarshisida yuz-ko‘zini «tartibga keltirib» — pardoz qilib oladi. Mabodo pardozni xushlamasangiz ham, hech bo‘lmasa lab bo‘yog‘idan foydalanishingiz tabiiy. Pardozning asosiy buyumlaridan biri bo‘lgan lab bo‘yog‘ini tanlayotganda nimalarga e'tibor qaratasiz?

Lab bo‘yog‘i: yorqin — shaftoli, apelsin, qizg‘ish-sariq; ko‘zga tashlanmaydigan — pushti; neytral — sarg‘ish, malla va tuproqning tabiiy rangiga mos keluvchi tusdagi ranglarga bo‘linadi.

Tuslar o‘ta yorqin, o‘rtacha va to‘q toifalarga ajratiladi. Ulardan birini tanlayotganingizda ko‘zlaringiz, yuz teringiz, sochlar va tish­laringiz rangi, lablar o‘lchami, yoshingiz hamda kunning qaysi payti, chiroqlarni hisobga olishingiz zarur.

Kulrang ko‘z sohibalari…

…tiniq sarg‘ish va olcha, moviy ko‘zli go‘zallar esa sarg‘ish-pushti, gilos, ko‘zlari zumradni aks ettirgan xonimlar esa terrakota (qizilning malla tusi va tuproq rangi), qizg‘ish-apelsin tusdagi, jigarrang ko‘z sohibalari malla, yorqin qizg‘ish, och pushti tusdagi lab bo‘yoqlarini xarid qilishlari mumkin.

Agar teri rangi

…qoramag‘iz bo‘lsa, shokolad, vi­no, qizil, olcha ranglari va ularning ko‘zga tashlanmaydigan tus­lari, oppog‘oylarga sarg‘ish, yor­qin qizg‘ish-sariq, yorqin pushti tuslar mos keladi. Neytral toifadagi lab bo‘yoqlari ham yorqin, ham od­mi rangdagi liboslarga mos keladi.

Lablar o‘lchami

Yorqin rangli bo‘yoqlar lablarni qa­linroq qilib ko‘rsatadi. To‘q ranglari aksincha. Lablaringiz qalinroq ko‘rinishini istasangiz, uning chetlarini aynan lab bo‘yog‘i rangidagi qalam bilan chizish tavsiya etiladi. Lab bo‘yog‘i kos­metik mo‘yqalam yordamida suriladi, labning o‘rta qismi esa suyuq, yal­tiroq bo‘yoq bilan ajratiladi. Agar lablaringiz qa­lin bo‘lsa, e'tiborni tortmaydigan, oq­shom­lar uchun esa yaltiroq lab bo‘yog‘ini tanlang.

Sochlar

Mallasoch, terisi oq va ko‘zlari moviy rangli bo‘lgan ayollarga pushti rangga yaqin, olxo‘ri rang­li va qizg‘ish tusli, ko‘zlari jigarrang, mallasochlarga pushti va qizil rang yarashadi. Sariq sochli xonimlarga olxo‘ri, malla, qizg‘ish ranglar mos. Teri rangi och, ko‘zlari esa kulrang yoki moviy, qora sochli xonimlar klassik alvon yoki och binafsha rang­ga yaqin tusni, qoramag‘iz, sochlari ham ko‘zlari ka­bi tim qora xonimlar olcha, shokolad, apelsin va to‘q qizil rangli lab bo‘yoqlarini tanlashlari mumkin. O‘rtacha yorqinlikdagi lab bo‘yoqlari barchaga birdek mos keladi.

Oppoq tishlar o‘z sohibasiga ranglar tanlovida erkinlikni tuhfa qiladi

Bunda faqat libos va pardoz rangi hisobga olinsa bas. Sarg‘aygan yoki tilla tishlar esa ehtiyotkorlikni talab qiladi: binafsha va shunga yaqin tuslar, malla, to‘q-qizil ranglardan voz kechilgani ma'qul. Sariqqa moyil, yorqin qi­zil, tiniq pushti rang­lar pardoz bilan birga o‘ziga xos uyg‘unlik kasb etadi.

Shuningdek…

Bo‘y qizlar yor­­­­­qin ranglarni, yosh ayollar to‘yingan ranglarni (albatta, kunning qaysi paytligini hi­sobga olib), katta yoshli ayollar esa to‘q ranglarni tanlaganlari ma'­­­­qul. Ko‘z­ga tash­­­­­lan­may­digan ranglar ajinlarni yashiradi.

Bo’lishmoq