Dono bekaning 10 qoidasi

Yaxshi beka degan nomga sazovor bo‘lish barcha ayollarning orzusi. Aziz opa-singillar, dugonajonlar, siz ham buning ha­rakatida bo‘lsangiz, bizning maslahatlarimizga quloq tuting. Quyida oilaviy baxtga eltuvchi bir necha sirlardan boxabar qilmoqchimiz.

1. Dono bekaga vazminlik, vafodorlik tushunchalari xos. U oilasining tinchligini doim birinchi o‘ringa qo‘yadi. Oilasidagi muhit («ob-havo») ko‘p jihatdan un­ga bog‘liqligini juda yaxshi tushunadi va shunga ko‘ra yo‘l tutadi.
2. Oila hamjihatlik demakdir. Nikoh muhabbat, bir-birini tushunish va o‘zaro hurmat asosida qurilishi kerakligini yodda tuting.
3. Oilangizda orzular uyg‘unligini yarating. Oila qurish go‘yoki yangi binoning qad ko‘tarishi ka­bi. Turmushingiz davomida sodir etgan har bir harakatlaringizni mana shu bino asosiga qo‘yilayotgan g‘ishtlarga o‘xshatish mumkin. Bino qanchalik mustahkam bo‘l­sa, unda shuncha uzoq vaqt yashaysiz.
4. Ayol kishi tabiatan ijodkor ekanligini unutmang! Hayotingizning har bir kunini unutilmas, turli yorqin rang­lar bilan bezashga va uyingizda doim xushkayfiyat bo‘lishiga ha­rakat qiling.
5. Hissiyotlarga erk bermang! Oqila beka g‘a­zabni ko‘rsatish tarbiyasizlikning bir ko‘rinishi ekanini, hech qa­­­chon, hech qayerda bunga yo‘l qo‘ymaslik kerakligini yaxshi biladi. Bordi-yu, qalbida bunday his paydo bo‘lsa, shu muammoni bartaraf etish chorasini izlashga tushadi.
6. Oqila beka kechirimli bo‘ladi. Hamma ham hayoti davomida xatoga yo‘l qo‘­yishi mumkin, bu holat turmush o‘rtog‘ingizda ham bo‘lishi tabiiy hol.
7. Sabrli bo‘ling! Sabr-toqat — insondagi eng ulug‘vor fazilat. Sabr o‘rinsiz holatlardan, keraksiz gap-so‘zlardan saqlaydi.
8. Oqila ayol o‘ziga va atrofdagilariga quvonch ulasha oladi. Barcha narsalardan, hatto ju­­­­­­da kichik narsalardan ham yaxshilik izlaydi.
9. Boricha qabul qilishni o‘rganing. Unutmang, insonlar o‘z tuyg‘ularini turlicha ifoda etishadi. Turmush o‘rtog‘ingizdan o‘zingiz istagan tasavvuringiz darajasidagi harakatlarni kutmang. Uning sizga bo‘l­gan munosabatini qadriga yeting.
10. O‘rningizni biling. Haqiqiy beka hech qachon turmush o‘rtog‘i bilan munosabatlarda yetakchilik qilish uchun raqobatlashmaydi. U umr yo‘ldoshiga nisbatan hurmatda bo‘ladi va hech qachon unga shaxsiy mulkiga qaragandek qa­ramaydi. Har qanday erkak ayolining nazokatli, yoqim­li, ha­yoli bo‘lishini istashini unutmang.

Demak, yaxshi beka doimo:

• Kirim va chiqimlarini nazorat qiladi. Bu qachon va qancha sarflaganini aniq bilish imkonini beradi.
• Kutilmagan mehmonlar tashrif buyurganida ham, shoshib qolmaydi. Ularni tezda mazali ­taomlar bilan siylaydi.
• Oshxonada yangiliklar yaratishga harakat qiladi, bu bilan har safar yaqinlarini xushnud etadi.
• Yaxshi bekaning turmush o‘rtog‘ini har kuni issiq, kechki ovqat kutadi.
• Uyida erta uchun ham yetarlicha mahsulotlarni g‘amlash haqida o‘ylaydi. Katta xaridlar qilmoqchi bo‘lsa, oldindan oz-ozdan pul yig‘ib boradi.
• Uy saranjomlash uning har kunlik yumushidir.
• Yaxshi uy bekasi barcha jihozlarini joy-jo­yida saqlaydi, hatto an­cha vaqtdan beri ishlatilmayotgan buyumlarni qa­yerda ekanligini ham yaxshi biladi.
• Vaqtni to‘g‘ri taqsimlashni o‘rganing. O‘zingiz uchun har kuni ertalab hech bo‘lmaganda 15-20 daqiqa vaqt ajrating.

Bo’lishmoq