Тухум ва сут маҳсулотларини тўғри сақлаш қоидалари

Маълум бўлишича, кўпчилигимиз сут маҳсулотлари ва тухумни тўғри сақламас эканмиз. Шунинг учун улар тезда бузилиб, биз уларни айниган эканлигига шубҳаланмасдан истеъмол қиламиз. Балки орамизда уларни тўғри сақлайдиганлар ҳам бордир, бироқ кўп ҳолларда биз бу маҳсулотларни янглиш тарзда совуткичнинг улар учун мос бўлмаган жавонига жойлаштириб қўямиз. Доктор Комаровский бундай маҳсулотларни тўғри сақлаш ҳақида ҳикоя қилади. Буни билиш муҳим, чунки сут маҳсулотлари ва тухум деярли ҳар бир хонадонда мавжуд ва кўпинча биз бу маҳсулотларни болакайларга берамиз.

Сут

Сутни албатта 5 даражадан юқори бўлмаган ҳароратда сақлаш лозим. Шунинг учун уни совуткичнинг эшигига жойлаштириш нотўғри. Чунки совуткичнинг бу қисмида ҳарорат ҳар доим баландроқ бўлади ва биз унинг эшигини очганимизда унга хонадаги иссиқ ҳарорат ҳам киради. Шунинг учун уни узоқроқдаги токчада сақланг. Қолаверса, сутни бир ҳафтадан ортиқ сақламанг.

Пишлоқлар

Қаттиқ пишлоқлар сут каби муздек ҳароратни талаб қилмайди. Агар пишлоғингиз яхши ўралган бўлса, уни совуткичнинг исталган қисмида уч-тўрт ҳафтагача сақлаш мумкин.

Творог

Творогни зинҳор бир ҳафтадан ортиқ сақлаш мумкин эмас. Шу билан бирга уларни ҳам худди сут каби совуткичнинг ўртароқ қисмида жойлашган жавонига жойлаш мақсадга мувофиқ ҳисобланади.

Йогурт

Йогурт қандай қутида, хоҳ у қопқоқли картон қути ёки юмшоқ пакетда сақланмасин, уни бир ҳафтадан ортиқ сақлаш мумкин эмас. Совуткичда уни сутнинг олдига жойлаштириш керак.

Тухум

Тухумни қандай сақлашни билиш жуда муҳим. Ахир совуткичнинг эшигида жойлашган чуқурчалар аслида уларни тўғри сақлаш учун мос келмайди. Тухумлар айниб қолмаслиги учун уларни харид қилинган мосламада совуткичнинг ўрта ёки юқори жавонига ва иложи борича унинг деворига яқинроқ жойлаштиринг. Тухумни энг совуқ жойда ҳам уч ҳафтадан ортиқ сақлаш мумкин эмас.